Шачема масторозе — Мордовиясь



Шачема масторозеМордовиясь

2011-05-20 09:48:32

Мон келькте, крайняй, мокшень мазы мора,

И аф юкстате, коса тязан уль.

Тон касфтоть лама славнай стирь и цера,

Синь лемсна масторть келес содафткульфт,

Ульхть яла павазу!

Шумбраня, крайняй, ульхть!                                   

                                       И.Кудашкин

Модать лангса эрь шуфтонять ули сонцень юроц, эздонза сон и касы. Тяфтама юроц эряфса ули и эрь ломанть. Мокшетнень эряфонь шуфтснонды аф фкя тёжянь киза. Сонь шерьфнезе аф фкя варма, синнезе аф фкя давол, пълхнезе аф фкя атям. А сон коль эряй и эряй.

Мокшетнень юрсна тушендыхть ичкози. Аф стак путневихть тячи Европаса ся нароттнень ёткс, конатнень ули кунардонь историясна, козя культурасна. Синь ётасть историческяй аф тёждя ки, аф весть няфнемок героизма и мезьдовок аф пелема Родинать инкса тюремста. Великай Отечественнай войнаса мужестванкса и героизманкса казьфтольхть сяда тёжянь боецоньке и командироньке. Эздост сяда нилети максф Советскяй Союзонь Героень лем, а комсь ветие ломаттне арасть Славань орденонь кавалеркс.

Тейнек, мокшэрзятненди, афкукс ули мезенкса и кинь инкса марямс гордость, оцю слава народоньконди кандсть патриархсь Никон, историксь Ключевский, скульпторсь Степан Эрьзя, легендарнай летчиксь Михаил Девятаев. Лама зырняда, сияда и бронзада сувафтсть Россияти олимпийскяй чемпиоттне: Олег Маскаев, Ольга Каниськина, Валерий Борчин и ламотне лиятне.

Тяниень пингть Атюрьевскяй районца, кода и марнек Мордовия Республикаса, оцю мяль шарфневи спортти. Эрь кизоня ётафневихть тяса лама видонь спортивнай пялькстомат. Сембода оцю пялькстоматне ётафневихть ласькомать коряс, конат лемневихть Великай Отечественнай войнать пингста колма Совесткяй Союзонь Геройхнень лемс: А.Г.Махровонь, Ф.Ф.Коноваловонь и Е.Г.Акиняевонь. Тя пялькстоматненди сашендыхть участникт сембе Мордовия Республикать райононзон эзда.

Атюрьевскяй районць козя талантливай ломанензон мархта. Тяса шачсь мокшень поэзиять цёфксоц -Александр Степанович Малькин. Вага ни мзяроце кизось, эрь тунданя, поэтть шачема шинянза Кяшалса, Атерь велеса ётафневихть васетькшнемат, конат лемтьфт А.Малькинонь шачема шинцты. Тяза сашендыхть Поэтти сюконяма, мархтонза, калмонц лангса седишкада корхнема, ваймонь аропнема пяк лама ломаньда: Саранскяйста, лия районцта, сембе Атюрьевскяй велетнень эзда.

А.Малькинонь сембе поэзияц — тя седиень пети музыка. Стихонза тёждят лувомс и морамс. Сонь поэзиянц можна путомс С.Есенинонь, А.Твардовскяень и М.Исаковскяень ваксс. Поэтсь творчествасонза няфнезе оцю кельгоманц эсь Родинанцты, шачема краенцты. Тя лац няеви «Россия, кельгома Россия» стихонц эзда:

Россия, кельгома Россия,

Ки крайса акша келунал.

Тонь славаце мирть келес лии,

И колгат яла лямбе валсь!

Атюрьевскяй районць республикасонк лувондови вастокс, коса пяк маштозь и кородозь ванфневи сембось минценнесь, национальнайсь. Тястонь эряйхне аф юкснесазь атяснон-бабаснон кунардонь пара койснон-тевснон, корхтайхть тядянь-алянь кяльса. Въдь кяльсь — тя инь оцю казнесь, козяшись, конань ломанти максозе природась. Кяльсь ванфтсы сянь, мезе ульсь народть эряфса, азондсы сонь ётаф кинц-янонц.

Эрь ёфксть ули эсь вастоц масторть лангса, коста сон сявозе эряфонь вийть. Тяфта и ломантьке. Ломанть улихть сонцень юронза, конат максыхть теенза эряф. Тястонь эряйхненди — тя Мордовия Республикась.

Монь пара мялезон: мокшень народсь ашезь юма-ара лия оцю пляматнень ёткса, сон ванфтозе эсь веранц, кемокстазе эрьгавшинц, кеме юронзон-коензон, эсь мазы кяленц, пуроптсь козяши и духовнай культура.

Ульсь пинге, мъзярда мокшэрзянь краеньконь колга кържа коса содасть, ламотне нъльня тапарякшнезь лия нароттнень мархта.Тяни Мордовиясь содаф Россиять пъцтай сембе уженянзон эса. И тя, конешна, васендакиге сотф Республиканьконь оцю сатфксонзон мархта эряфонь сембе ширетнень эса. Мордовиясь ламотненди арси примеркс. Ширезонк кармасть сашендома лама инжида аф аньцек Россиянь региоттнень эзда, но и омба масторстовок.

2012 кизоня Мордовия Республикасонк ули оцю ила — отмечави мокшэрзянь народть Российскяй государствань нароттнень мархта ладязь эрямаснон 1000 кизонь топодемац. Монь койсон, тя илась сядонга козякофтсы Россиянь культурать, кемокстасы родинаньконь народонзон еткса ялгаксшить и фкя — фкянь мархта ладямать.

Кельгса шачема — касома масторозень и пяк мялезе, штоба кизоста кизос сон аньцек касоль и вииякшнель, арсель содафокс и примеронь сявома вастокс.

Анастасия Шукшина, Перевесье велень школань тонафнись.

http://kulyat.info/selskie-vesti-aturevo/9004-shachema-mastoroze-mordoviyas.html



sitemap
sitemap